Karaman ti mechanical ken human factors kadagiti anggulo a kitaen ti Philippine Air Force kalpasan ti panagcrash ti FA-50 fighter jet itay nabiit idiay Bukidnon.
Daytoy ket sigun kenni PAF spokesperson Colonel Maria Consuelo Castillo.
Naala dagiti otoridad ti flight data recorder ti eroplano a makatulong a maduktalan ti kinapartak, kangato ken kasasaad ti eroplano idi napasamak ti aksidente.
Simmangpeten metten ti investigation team ti Philippine Air Force iti crash site sadiay Bukidnon tapno mangisayangkat iti forensic investigation.
Narekober met ti bangkay dagiti dua a piloto iti crash site itay laeng nabiit, ken naiturong iti maysa a funeral parlor sadiay Cagayan de Oro ken naituding a maitayab ita nga aldaw wenno Sabado iti Villamor Airbase para iti military honors.
Maysa kadagiti pimmusay ni Lieutenant AJ Dadulla, a dandani a maikasar kuma iti fiancée daytoy inton Marso 15.
