Pimmusayen ni Felicien Kabuga, maysa kadagiti kangrunaan a suspek iti 1994 Rwandan Genocide bayat a sumangsango iti pangngedeng ti kaso na iti International Criminal Court (ICC) idiay The Hague sigun iti United Nations.
Kinumpirmar daytoy ti International Residual Mechanism for Criminal Tribunals a pimmusay ni Kabuga iti maysa nga ospital ita a lawas iti edad na a 90.
Inakusaranda ni Kabuga kas maysa kadagiti adda iti likod ti Radio-Television Libre des Mille Collines o RTLM, maysa nga istasyon ti radyo a maatap a nang-allukoy kadagiti ethnic Hutu a patayenda dagiti Tutsi iti katengaan ti genocide.
Naarestar ni Kabuga idi 2020 idiay Paris kalpasan iti tallo a dekada a panaglemmengna manipud kadagiti otoridad aramat dagiti peke a pasaporte daytoy. Apaman a naaresta, naiyakar daytoy idiay The Hague.
Inbilin met ti presiding judge a ni Graciela Gatti Santana ti nainget nga imbestigasyon seknan iti rason ti ipupusay ni Kabuga. //bombokaren.c.s
