Saan a pinatgan ti International Criminal Court (ICC) Trial Chamber III ti kiddaw ti defense counsel a maaramat ti Tagalog iti sumagmamano a paset iti opening statement ti umadani a trial.
Daytoy ti maysa kadagiti desisyon nga inaramid ti korte kabayatan iti maika-lima ken maudi a status conference dagitoy.
Sigun kenni Presiding Judge Joanna Korner, posible nga adadda nga agbalin a komplikado ti application dagiti biktima ken manayunan ti trial cost gapu kadagiti translation requirements nu mapalubosan ti pannakaaramat ti Tagalog iti trial. Malaksid iti dayta, kinunana a saan a paset ti Tagalog iti official languages ti International Criminal Court (ICC).
Sigun ngamin iti Rome Statue, ti bigbigbigen ti ICC kas official language ket English ken French.
Kabayatanna, impeksa met ni Peter Haynes, defense counsel ni FPRRD ti panggepda a makipaset ken agsao iti panagrugi ti trial para iti kaso ti sigud a presidente.
Saan met a naimatangan ni FPRRD kalpasan iti kiddaw ti depensa a saan pay laeng daytoy a makipaset iti nasao a conference.
