Balligi a naipatungpal ti Medical ken Dental Mission- Civic Action (CIVAC) Program nga impatungpal ti 5th Civil Military Operations (Kabalikat ) Batallion , Civil Military Operations Regiment , Philippine Army nga adaan iti tema a ” Love, Health, and Wellness – A Valentine’s Gift for All” kas paset iti panakaselebrar ti Valentines day sadiay Barangay Tawang, La Trinidad, Benguet Multipurpose hall ita nga aldaw.
Iti pannakiuman ti Bombo Radyo kenni 1LT RHENMAR M YANDOG (QMS) 5th Civil-Military Operation Battalion (5CMOBn), Civil-Military Operations Regiment (CMOR) , Philippine Army, kinunana nga amin dagiti maidiaydiaya sadiay ket libre.
Sumagmamano kadagiti idiaydiaya-da ket libre a pukis, libre nga agas, dental, bado (ukay- ukay), eye glass ken adda pay iti mental health seminar.
Agarup dua pulo met dagiti kakaduada dagitoy kadagiti nagduduma nga organisasyon tapno mabaelan dagitoy a mangisayangkat ti kastoy a kadakkel a medical ken dental mission.
Iti sabali a bangir, maragsakan dagiti umili nangruna kadagiti senior citizens gapu ta naikkan dagitoy iti gundaway a makaala kadagiti libre a serbisyo a nabayag a kalkalikagumanda.
Impeksa metlaeng ti barangay kapitan a ni Juluis Tiyap ti panagyamanna kadagiti Philippine Army ken kadagiti kakaduada gapu iti suporta dagitoy iti nasao a programa.
Imbinglayna pay a saan laeng a dagiti taga Tawang dagiti inayabanda no diket pati kadagiti kabangibang a barangay nga asideg iti Barangay Tawang.
Innayon met ni Yandog, a ti nasao a barangay ti napili dagitoy gapu ta adayo daytoy iti centro wenno kadagiti medical centers wenno ospitals.//Bombo Noveh Organo
