BAGUIO CITY- Agsagsaganan dagiti amin a miembro ti Cordillera Regional Disaster Risk Reduction and Management Council para iti panagrugi ti panagtutudo kagiddan ti panakapasar ti sagpamingsan a nakapoy agingga napigsa a tudo iti nagduduma a paset ti rehion.
Paset daytoy ti naangay a panagtaripnong dagiti member-agencies tapnu idanun ti panagsagsagana nga ar-aramidenda.
Sigun kenni DILG-Cordillera Regional Director Marlo Iringan, nakasagana amin a member-agencies ken ar-aramiden amin dagitoy ti kabaelanda tapnu maipaka-ammo iti publiko ti disaster risk reduction and management (DRRM) malaksid pay iti nangato a lebel ti kinasagana nga agresponde iti aniaman a kalamidad wenno didigra.
Kinunana nga iti benneg ti DILG ket agtultuloy ti panangimpluwensiada kadagiti lokal a gobyerno tapnu irtengan pay dagitoy ti lebel ti kinasaganada dagiti tattao iti masakupanda nga agresponde no adda ti didigra.
Impannakkelna met a dakkelen ti maar-aramidan dagiti lokal a gobyerno ti Cordillera iti panangbukel dagitoy iti DRRM plan para iti masakupanda.
Ipalpalagip pay ni Iringan ti panangipangruna dagiti mayor ken gobernador iti rehion iti amin nga aspeto ti DRRM iti panangimaton dagitoy iti masakupanda a lokal a gobyerno tapnu maipasigurado ti kinatalged ti amin a pamilya ken ti komunidad dagitoy.
