Kiniddaw ni Health Secretary Teodoro Herbosa iti publiko a saanda a baybay-an ti maipapan iti mental health dagiti tattao a naapektaran iti panagdalapos dagiti nagsasaruno a didigra.
Maibasar iti datos iti Department of Health (DOH), dumanon iti 1,522 nga indibidwal manipod nagduduma a paset iti Cebu ti nakaawat iti Mental Health and Psychosocial Support (MHPSS) ken daduma pay nga intervention.
Agsagsagana metten ti nasao nga ahensya para iti komprehensibo a plano para iti panakaipaay iti psychological first aid kadagiti residente iti Davao Region ken kabangibang daytoy a lugar a naapektaran iti magnitude 7.4 a ginggined.
Sigun kenni Herbosa, ti nasao a tignay ket maitunos iti bilin ni President Ferdinand Marcos Jr. a siguradwen a saan a mabaybay-an dagiti umili a makapaspasar ita iti panagbuteng, ken anxiety gapu kadagiti didigra.
Maipalagip nga idi laeng napan a lawas ken agingga idi kalman ket narikna ti panagdayyeg iti daga kadagiti nagduduma a lugar iti Pilipinas nu sadino, karaman ti magnitude 7.4 a ginggined a dimmalapos idiay Davao Oriental ken ti magnitude 6.9 a dimmalapos met idiay Bogo City, Cebu kadagiti posible a kapigsaan.
