![](https://img.bomboradyo.com/baguio/2024/05/ABANDONED-BABY-1.jpg)
Tiniliw ti National Bureau of Investigation (NBI) ti midwife a nanggandat a mangilako iti six-day-old baby girl iti P25,000 bayat ti entrapment operation idiay Muntinlupa City idi Hulyo 16.
Nabigbig ti midwife a ni Maria Christina Paule.
Sigun kenni NBI Director Jaime Santiago, ilaklako ti suspek ti maladaga iti Facebook.
Sigun met kenni NBI Anti-Human Trafficking Division Chief Olga Angustia – Gonzales, nakaawatda iti inisyal nga impormasyon manipud iti Department of Justice Cyber-Trafficking in Persons Monitoring Center maipapan iti iligal a panagilako ti maladaga.
Gapu iti daytoy, kinontak ti undercover agent ti suspek babaen iti social media.
Ditoy a naduktalan a ti maladaga ket kaiyan-anak ken ti ina ket siguden a pasyente ti midwife.
Saan pay a nakarehistro ti maladaga nu sadino kinuna ti suspek nga isuna ti makaammo iti registration apaman a magatang daytoy.
Nupay kasta, idi natiliw ti suspek ket kinunana nga inabandona ti ina ti maladaga.
Iti agdama ket birbirukenen dagiti otoridad ti ina ti maladaga ken posible a makasoan daytoy iti child abuse wenno abandonment.