![](https://img.bomboradyo.com/baguio/2019/12/wally.jpg)
BAGUIO CITY – Inladawan ni 2019 SEA Games wushu sanda gold medalist Divine Masadao Wally a naisang-sayangan ti panangabakna iti nasao a medalya gaputa nagun-odna daytoy iti maysa nga international event a maisaysayangkat ditoy pagilian.
Iti eksklusibo a panakiyuman ti Bombo Radyo, imbingayna a saan a nagbalin a lapped ti marikrikna a panagut-ot iti abagana tapnu saanna a maipangabak dagiti nagbalin a labanna iti 48kgs division iti wushu sanda competition ti manarimaan a 2019 SEA Games.
Kinuna ti two-time world wushu gold medalist nga inkondisyonna ti bagina nangruna ti abagana tapnu saanna a marikna ti ut-ut kabayatan ti labanna nupay saan unay daytoy a nakaro.
Kinunana a naalana ti nasao a dunor iti abaga idi 2016 ken agsubli-subli gapu iti agtultuloy a panagsanayna.
Naamuan a daytoyen ti maikadua a panakaipasungalngalna iti SEA Games manipud naka-silver medal iti wushu sanda idi 2013 SEA Games kalpasan a saan a nairaman ti nasao a discipline iti panakaisayangkat ti biennial event idi 2015 ken 2017 gapu iti saan a panangiraman ditoy dagiti host countries iti event ti wushu competitions.
Sigun kenni Wally, dakkel ti panagyamanna iti presensia ti kasinsinna a ni mix martial arts legend ken sigud a ONE Lightweight World Champion Eduard Folayang a nakanayon iti motibasyonna.
Naamuan a ti inabak ti Igorota wushu fighter a ni Nguyen Thi Chinh (CHING) ti Vietnam ket inabakna ni Wally iti quarterfinals ti semifinals ti 2019 World Wushu Championships a naangay idi napalabas nga Agosto.
Ni Wally a tubo ti Sadanga, Mountain Province ket bronze medalist iti 9th Sanda World Cup 2018 ken iti 2018 Asian Games ken kaunaan a babai a miembro ti Philippine Wushu Team a nangabak iti World Wushu Championship idi 2015 ken iti 8th Sanda World Cup idi 2016 malaksid pay iti gold medal iti9th Asian Wushu Championship idi 2015.