BAGUIO CITY – Agtultuloy ti hot pursuit operation nga ipatpatungpal ti nagtipon a kameng ti Abra-PNP ken ti Philippine Army sadiay Abra kalpasan ti napasamak nga engkuentro iti nagbaetan ti kameng ti 24 Infantry Battalion ken ti Kilusang Larangang Guerilla North Abra sadiay Sitio Konipliw, Brgy. Danac East, Boliney, Abra idi kalman.
Sigun kenni Capt. Jefferson Somera, spokeperson ti 5th ID, kabayatan ti panangipatungpal ti maysa a platoon ti 24th IB iti combat operations ket pinaputokan dagitoy ti nasurok kumurang 20 a kameng ti NPA indadauloan ti alyas Payas.
Dagus met a nagpaputok dagiti suldado ken nagpaut iti tallo pulo a minuto ti rinnupak.
Kinuna ni Somera nga awan met ti nadangran ti kameng ti tropa ti gobierno bayat nga am-ammuen paylaeng dagiti otoridad no adda ti nadangran iti kameng ti rebelde a grupo.
Kinuna pay ni Somera nga agtultuloy ti panangmonitor dagitoy iti presenya dagiti rebelde a grupo sadiay Boliney, Abra.
Innayonna a ti agsasarunu nga engkuentro ti kameng ti gobyerno ken ti rebelde a grupo ket epekto ti panangipatungpal dagitopy iti nainget nga opensiba kas bilin ni Philippine Army commander Major Gen. Paul Atal.
