BAGUIO CITY – Pimmusay ti maysa a minero bayat a nadangran ti kadwana a laborer iti insidente ti pammaltog sadiay Kayang-Hilltop, siudad ti Baguio idi kalman ti parbangon.
Nabigbig ti pimmusay a ni Arjay Gonzales, 26-anyos, naasawaan, residente ti San Pascual, Tuba, Benguet bayat a nabigbig ti nadangran a ni Mark Anthony dela Valle, 27-anyos, baro, residente ti Upper Rock Quarry, Baguio City.
Nabigbig met ti suspek a ni Winston Emo, 26-anyos, laborer ken residente ti Sablan, Benguet.
Maibasar iti report ti Baguio City Police Office – Station 7, napasamak ti pammaltog kabayatan ti panaguray dagiti biktima ken dagiti kakadwada iti taxi kalpasan ti panagturongda iti maysa a balay paginuman.
Dagus met a nagtawag iti pulisya dagiti nakakita iti insidente bayat a naglibas ti suspek.
Nakemmeg ti suspek iti paset ti Shagum Street, Baguio City ken narekober kenkuana ti 9mm pistol a paltog.
