Impakaamo ti militar ti Israel a nalapdanda ti missile a naipatayab manipud Yemen nga agturong iti Israel iti panangraut dagiti Houthi ti Yemen.
Daytoy ket kagiddan ti panaguni dagiti “sirens” iti sumagmamano a lugar iti Israel.
Manipod idi nangrugi ti gubat iti nagbaetan ti Israel ken Hamas idi Oktubre 2023, ti Houthi ket nagtultuloy a nagpaputok kadagiti missile iti Israel kas panakikaykaysada kadagiti Palestinian idiay Gaza.
Kaaduan kadagiti missile ti nasao a grupo ti nalapdan wenno saan a nakadanon iti nasao a lugar.
Sigun iti pannakangiwat ti Houthi military, responsableda iti panagatake.
Ita laeng a bulan, impablaak ni United States President Donald Trump nga isardengen ti Estados Unidos ti panagbombada kadagiti Houthi idiay Yemen gaputa immanamong ti nasao a grupo nga isardengdan ti panagatake kadagiti barko ti Estados Unidos iti sidong ti Oman-mediated ceasefire deal.
Nupay kasta, saan a karaman ti Israel iti nasao a katulagan.
