BAGUIO CITY – Sumangsango iti kaso a panaglabsing iti Special Protection of Children Against Abuse, Exploitation and Discrimination Act ken physical injuries ti maysa nga ama kalpasan ti panangdangranna iti maysa nga ubing ditoy siudad ti Baguio.
Ti suspek ket addaan iti legal nga edad ken residente ti Irisan bayat a ti biktima ket ubing a lalaki.
Maibasar iti report ti pulisya, nagpasyar ti suspek iti balay ti ina ti biktima gaputa sadiay nga agnanaed ti ex-wife daytoy.
Naamuan a naginom iti arak ti suspek ken ti kaanakan daytoy bayat a ti anakna ken ti biktima ket nagay-ayam iti ayan ti kalsada.
Iti saan a masinunuo a rason, nakaunget ti suspek ken kinamatna ti ubing agingga a nagammatanna ti t-shirt daytoy ken ingguyud-guyodna iti kalsada.
Saan pay a napnek ti suspek ket binagkatna ti ubing ken impurwakna iti kalsada agingga a naitama daytoy iti bato a nangitunda iti panagsarsarwa ti biktima.
Pimmanaw met ti suspek kalpasan a pinukpukkawan daytoy dagiti maseknan nga umili nga isardeng daytoy ti ar-aramidenna iti biktima.
