BAGUIO CITY – Nakemmeg ti maysa a lalaki kalpasan a nasarakan ti nagduduma a kalibre ti paltog ken bala iti pagtaengan daytoy sadiay Barangay Pang-ot, Lagayan, Abra.
Nabigbig daytoy a ni Billy Pasiguen, maatap a miyembro ti Guzman Group, maysa a crimal group nga adda pakainaiganna iti gun-for-hire activities sadiay Abra.
Karaman kadagiti nasarakan ti maysa nga M16 rifle, 223 a pidaso ti bala ti M16, siyam a pidaso ti magazine ti M16, 11 a pidaso ti M203 grenade ammunition, maysa a caliber 45 pistol, maysa a magazine ti caliber 45, pito a pidaso ti bala ti caliber 45 ken dua a pidaso ti bandoliers.
Naiturong iti CIDG-Abra Office dagiti nakumpiskar nga armas para iti dokumentasyon bayat a maisagsagana met ti kaso a sanguen ti suspek partikular ti panaglabsing iti RA 10591 wenno ti Comprehensive Firearms and Ammunition Regulation Act.
