Nagbayad ti Metropolitan Manila Development Authority (MMDA) General Manager Nicolas Torre III iti P14,000 a multa gapu iti traffic violations a nakairamanan ti personal a lugan daytoy.
Kinumpirmar ti Land Transportation Office (LTO) a private SUV ni Torre ti na-impound a lugan kalpasan a natiliwan a dimmalyasat iti EDSA busway bayat a nakadisguise kas opisial a lugan ti ahensia.
Iti social media post, personal nga in-upload ni Torre ti video ti SUV a dumal-dalyasat iti EDSA busway ken kinunana a kukua daytoy MMDA patrol vehicle.
Inlawlawag ni Torre nga inaramatda ti nasao a linya ti kalsada tapno inspeksionenda ti nakaro a kasasaad ti trapiko.
Sigun kenni LTO Chief Assistant Secretary Markus Lacanilao, inaklun ni Torre nga adda iti uneg ti nasao a lugan iti dayta a gundaway ngem addaan iti driver.
Kalpasan a na-impound ti lugan, nadiscobre ti sumagmamano a biolasyon a pakairamnan iti license plate tampering, saan nga otorisado nga sticker ken markings, illegal modifications a kas iti blinkers.
Naituding ti hearing iti malem ti Biernes, Setiembre 4, kalpasan a nangipaulog ti LTO iti subpoena iti driver ti SUV.
Nupay kasta, nagbayad ni Torre iti multa sakbay paylaeng ti naituding a hearing.
Inyunay-unay ti LTO a mabalin latta a sumango ti driver iti license administrative penalties.
