BAGUIO CITY – Panggep ti technical working group (TWG) ti lokal a gobierno ti Baguio City a waswasen ti katulagan kadagiti UV Express ditoy siyudad nga agar-aramat kadagiti kalsada kas loading, unloading ken staging area.
Sigun kenni Police Major Oliver Panabang, miyembro ti nasao a TWG, manarimaanen ti pannakaiproseso ti papeles ken rekomendasyon dagitoy iti lokal a gobierno tapnu mawaswas dagiti Memorandum of Agreement kadagiti UV Express.
Inlawlawagna nga idi ket pinalubusan ti lokal a gobierno ti panagaramat ti UV Express kadagiti kalsada kas pagparadaan ken terminal Nupay kasta, kinunana a masapul a mawaswasen ti katulagan gapu ta kimmaron ti kinailet ti gunay ti trapiko ditoy siudad.
Kinunana a maysa met laeng daytoy nga aksion tapno mawayaan dagiti kalkalsada ditoy Baguio City.
Innayonna pay a no maipatungpal ti panggep ket maipawilen ti panagaramat ti UV Express kadagiti kalsada kas staging area ken maikkat dagiti Colorum a UV Express.
