BAGUIO CITY – Imbutaktak ti kapitan ti Irisan Barangay ditoy siudad ti Baguio ti maysa kadagiti modus nga ar-aramiden dagiti dadduma a motorista mainaig iti implementasyon ti anti-road obstruction.
Segun kenni Punong Barangay Tomas Dumalti, ik-ikkaten dagiti dadduma a motorista ti plaka dagiti lugan dagitoy ken iparadada lattan kadagiti igid ti kalsada sadiay tapnu agparang a nabaklasan dagitoy iti plaka.
Kinunana nga ikabkabit met laeng dagiti nasao a motorista ti bukodda a plaka iti kanito nga usarenda ti lugan dagitoy.
Gapu iti daytoy ket binilinna dagiti opisyales ti barangay a piktyuranda dagiti nasao a lugan ken isumitir ti barangay dagiti nasao a ladawan iti Land Transportation Office tapnu saanda a makapagpabaro iti lisensiya.
Dinakamatna met a sipud nangrugi ti implementasyon ti nasao nga ordinansa ket dumanonen iti tallogasut ti plaka dagiti lugan a nabaklas iti masakopanna a barangay.
