BAGUIO CITY – Impanamnama ti ama ti Benguet a maaramaten inton sumaruno a bulan, January 2021 ti molecular Laboratory para iti COVID-19 a masarakan iti Benguet General Hospital (BeGH).
Iti interview ti Bombo Radyo Baguio, kinuna ni Governor Melchor Diclas a mau-uray laengen ti panakaipaay ti License to Operate ti pasilidad.
Kinunana a posible nga inton sumaruno a bulan ket maawatan ti nasao a lisensia kagiddan ti panangkompletoda kadagiti kagawaan a maaramat iti laboratoryo.
Innayonna nga ita a bulan ket posible a maisayangkat ti dry-run iti laboratoryo sakbay ti pormal a panaka-aramat daytoy.
Impannakkelna a dumanon iti 500 a COVID-19 testing ti inaldaw a mabalin a maisayangkat iti nasao a molecular laboratory.
Patienna a makatulong daytoy iti naparpartak a panakaisayangkat ti testing para kadagiti agbalin a pasyente ti COVID-19 nangruna ita nga agtultuloy ti mailislista a kaso ti nasao a sakit.
Kabayatanna, dinakamat ni Gov. Diclas a manayonan dagiti kagawaan ti Dialysis Center ti BeGH gaputa adda ti ur-urayenda a 10 a dialysis machines para kadagiti dialysis patients iti probinsia.
