Maim-imbistagaran paylaeng ti motibo ti maysa a lalaki iti panangpaltogna iti padana a manganop a nangitunda iti ipupusay daytoy iti kabambantayan a paset iti nagbeddengan ti Ilocos Sur, Ilocos Norte, ken Abra kalpasan nga impagarupna a baboy-ramo daytoy idi Agosto 25, 2025.
Maibasar iti impormasyon a nakalap ti Bombo Radyo Vigan ti biktima ket agtawen iti 40, taga-Barangay Maradodon, Cabugao idinto a ti suspek ket agtawen iti 47, taga-Barangay Catucdaan, iti kapada a munisipyo.
Iti imbestigasyon dagiti otoridad, naganop ti suspek ken ti biktima iti nasao a kabambantayan ngem nagsinada iti nagturong a disso ngem kalpasan dayta nakadlaw ti suspek nga adda ti aggargaraw iti karuotan rason nga impagarupna a baboy-ramo.
Gapu iti dayta, pinaltoganna ti biktima iti iskupeta daytoy sakbayna a nadlaw a daytoy ti kaduana.
Mapapati met a saan a naigagara ti nasao nga insidente.
