BAGUIO CITY – Pimmusay ti maysa a motorcycle rider iti napasamak nga aksidente idiay Sitio Nan-agto, Natubleng, Buguias, Benguet idi rabii.
Nabigbig daytoy a ni Nelson Laleo, addaan iti legal nga edad, residente iti Irisan, Baguio City.
Maibasar iti inisyal nga imbestigasyon ti Buguias MPS, agpada a daldalyasaten ti motorsiklo ken delica van ti halsema highway idi killaat a nagdinnungpar dagitoy.
Saan met a nadangran ti driver ti van a ni Judy Aniban, 24-anyos, mannalon ken residente iti Madaymen, Kibungan, Benguet.
Nakapasar met ni Laleo iti dunor iti tenggedna ken dagus a naitaray iti Atok District Hospital ngem naideklara a dead-on-arrival.
Iti agdama ket addan ni Aniban iti kustodiya ti Buguias Municipal Police Station para iti umno a dokumentasyon.
