BAGUIO CITY–Imbalakad ni Atok Mayor Raymundo Sarac ti point-to-point a wagas ti panagbiyahe dagiti motorista iti paset ti halsema highway a masakupan ti nasao a munisipyo.
Iti panakiyuman ti Bombo Radyo iti mayor, kinunana a nataltalged no saanen nga agsardeng dagiti motorista kadagiti nagduduma a landmarks sadiay atok tapno maipasigurado ti proteksion ti kaaduan kontra iti COVID-19.
Nupay kasta, dinakamatna a nasken a mangiparang iti medical clearance dagiti motorista no saan a maliklikan nga agsardeng dagitoy kadagiti restawran wenno dadduma pay a disso iti nasao a lugar.
Kinunana a nakapauneg daytoy iti impaulogna a pammilin tapno malapdan ti posible a panagwaras sadiay COVID-19 ken tapno mapagtalinaed ti nababa a kaso ti nasao a virus iti nadakamat a munisipyo.
Imbinglay pay ni Mayor Sarac a naipaulog ti nasao a pammilin kalapasan a napaliiwda ti panaggigidan ken panagsisineksek dagiti motorista kadagiti balay-panganan sadiay a nangitunda iti saanen a panakaobserbar ti physical distancing.
Maipalagip a maysa ti Atok, Benguet kadagiti kangrunaan a daldayasaten dagiti motorista paturong kadagiti nagduduma a munisipyo ti Benguet ken kadagiti kabangibang daytoy a probinsia kas iti Mt. Province.
Malaksid iti daytoy, ado dagiti bikers nga agdaldalyasat iti nasao a kalsada, rason tapno ingetan pay ti lokal a gobierno ti paglinteganda kontra iti COVID-19.
