Mapalpalagipan manen dagiti motorista a dumaldalyasat iti Kennon Road a magna kadagiti alternatibo a ruta kas iti Marcos Highway.
Daytoy ket tapno maliklikan ti saan a nasayaat nga insidente nangruna ita a panagtutudo.
Iti pannakiuman ti Bombo Radyo kenni Gerald Jhune Alejo Jr., Local Disaster Risk Reduction and Management Office II, kinunana a napasaran manen ti panagreggaay ti daga iti nasao a kalsada ngem dagus metlaeng daytoy a nadalusan.
Immunan metlaeng a naipadamag ti masansan a panagreggaay ti daga ken bato sadiay kagiddan ti napigsa a panagbayakabak ti tudo ita a lawas.
Gapu iti dayta, inyunay-unayna kadagiti motorista nga agannad tunggal lumabas sadiay ken no mabalbalin ket magna iti dadduma a ruta tapno maliklikan ti aniaman nga insidente.
Impalagipna metlaeng a nasken a naridam iti aglawlaw agsipud ta adda dagiti kellaat a panagtennag dagiti batbato kasta metten nga agannad nga agmaneho gaputa nagalis ti kalsada ita a panawen.
