BAGUIO CITY – Napirmaan ti maysa a Memorandum of Understanding iti nagbaetan dagiti opisyal ti lokal a gobyerno ti Baguio City ken Region 1 wenno Ilocos Region para iti panagrugi ti tourism bubbles a maawagan ti ‘Ridge to Reef Tourism Bubble’ iti nagbaetan ti Baguio City ken Region 1.
Paset daytoy ti in-inot, naannad ken natalged a panaglukat ti industriya ti turismo iti Northern Luzon, partikular ti Baguio City, Ilocos Sur, Ilocos Norte, Pangasinan ken La Union.
Napili ti Region 1 a pakailukatan ti turismo ti Baguio gaputa nababa ti peggad dagitoy iti COVID-19.
Nupay kasta, adda latta dagiti health protocols a nasken a suruten dagiti turista kadagiti lugar a saksakupen ti Memorandum of Understanding.
Puntirya ti Baguio City ken Region 1 a September 21 ti panagrugi ti Ridge to Reef Tourism Bubble ti Baguio City ken Region 1.
Naamuan a gapu iti agdama a pandemya nga ituntunda ti COVID-19, ket nalugi ti lokal a gobyerno iti P1.67-B manipud iti sektor ti turismo.
Maiyusuat met ti web-based Baguio VISITA program a mangituding iti baro a direksion ti turismo ti siudad tapnu maital-o ti City of Pines kadagiti sangaili iti in-inot, sigurado ken natalged a wagas tapnu saan a makompromiso ti salun-at ken kinatalged ti amin.
