BAGUIO CITY – Nagtutuon a kaso ti naidatag kontra iti movie producer nga scammer a nangitaray iti mapattapatta a P150-M a kuwarta dagiti nagbalin a biktima ti iligal a transaksyon daytoy.
Nabigbig daytoy a ni Jay Rex “Boss Prince” Armodoval, 38-anyos, manipud iti Kapangan, Benguet a nakemmeg idi May 12 sadiay Balanga, Bataan babaen iti entrapment operation nga impatungpal ti NBI-Olongapo City gapu iti kaso daytoy a syndicated estafa.
Naiparang ti suspek iti sala ti korte ni Judge Danilo Camacho ti RTC – Branch 62, La Trinidad, Benguet ken naipasidong iti inquest proceeding sakbay a naipaisok iti La Trinidad District Jail.
Nasurok P5.4-M ti naitarayna kadagiti biktimana manipud iti probinsia ti Benguet bayat a minilmilyon met laeng a pisos ti naitarayna iti dadduma a biktimana kadagiti sabali a lugar nangruna ta adda ti naipila a kaso kontra iti suspek sadiay Olongapo City, Pampanga, Quezon City, Batangas ken reklamo manipud Davao City.
Naamuan a malaksid iti kaso a naidatag kontra iti suspek iti Benguet ket adda met laeng ti kaso a naipila kontra iti daytoy sadiay Bataan nga illegal possession of firearms ken syndicated estafa.
Naamuan pay a kaaduan kadagiti in-recruit ti suspek ket dagiti missionaries, pastors ken sumagmamano a kameng ti Philippine Air Force.
Kinuna met ti maysa kadagiti complainant a ni Niel Infanta a nag-invest daytoy iti Omni Incorporated nga imatmaton ti suspek gapu iti panangguyugoy kenkuana dagiti pastor a miyembro iti nasao a korporasyon.
Dinakamatna a P15,000 ti impuonanna iti nasao a kompanya kasukat dagiti produkto ken kari a makaawat daytoy iti interes agingga a naduktalanna a maysa daytoy nga investment scam a rason tapnu dagus nga agkamang iti NBI a nangitunda iti panakakemmeg ti suspek.
Kabayatanna, pinaglibakan met ti ti suspek dagiti alegasyon a maipabpabasol kenkuana ken impabiangan laengen iti abogadona ti proseso ti linteg.
Kagiddan iti daytoy ket nagkiddaw ni Armodoval iti pammakawan wenno dispensa gapu iti panakadadael manen ti imahe ti rehion Cordillera gapu iti nakairamananna a kaso.
Sigun met kenni Atty. Weda, abogado ti suspek, urayenda no anya ti agbalin a pangngeddeng ti korte iti impilada a mosyon para iti panagpiyansa ti kliyentena bayat a matingtingiting ti kaso daytoy.
Maibasar iti profile ti kompanya, maysa daytoy a multi-level marketing company, no sadino, ti presidente ket ti suspek.
