BAGUIO CITY- Nangrugin nga umawat ti Mt. Pulag National Park sadiay Kabayan, Benguet kadagiti bisita nga agtarigagay a sumang-at ken agpasyar iti maikadua a kangatuan a bantay iti entero a pagilyan.
Sigun kenni Mt. Pulag National Park Superintendent, Emerita Albas, limitado laeng iti 100 a hikers wenno lokal a bisita ti iakomodarda tunggal aldaw manipud iti sigud a 600 a bilang.
Nupay kasta, dagiti laeng lokal a turista manipud Baguio City ken Benguet bubble pakairamanan dagiti agtaud sadiay Tinoc, Ifugao ken iti Kayapa, Nueva Vizcaya ti mabalin nga agturong sadiay.
Inlawlawag ni Albas a kasapulan a makontrol ti iseserrek dagiti bisita gaputa adda pailaeng ti Benguet iti sidong ti Alert Level 2.
Impettengna a kasapulan nga agtulnog dagiti hikers kadagiti health protocols sakbayda a mapalubosan a sumrek iti Mt. Pulag kas ti panangiparangda ti Covid-19 vaccination card /certificate, medical certificate a pamaneknek a “fit to climb” dagitoy ken maipasidongda pay iti orientation ti DENR.
Maipalagip nga idi napan a lawas ket sinang-at dagiti dadduma a miembro ti Baguio Correspondents and Broadcasters Club wenno BCBC ti Mt Pulag kas panakikaykaysa dagitoy iti Earth Day. JT
