BAGUIO CITY – Nailukaten iti publiko ti Mt. Ulap sadiay Ampucao, Itogon, Benguet kalpasan a naiserra iti las-ud ti sumagmamano a lawas gapu iti clearing operations ti PNP kalpasan nga inuram dagiti NPA ti duwa a truck ti Philex Minining Corporation sadiay.
Sigun kenni PSIns. Jeffrey Vicente, dadaulo ti Itogon Municipal Police Station, impalubos ti organizer ti Mt. Ulap ti panakailukat daytoy ken ti panagsang-at dagiti turista sadiay idi sabado.
Nupay kasta, kinunana a nasken kuma a saan pay daytoy a nailukat iti publiko gaputa kasapulanda paylang nga agpre-caution.
Iti baet daytoy, naingetda latta a binilin dagiti agbanbantay sadiay a bilangenda a naimbag dagiti turista a sumangbay ken sumang-at iti nasao a bantay agingga iti makababa dagitoy.
Kabayatanna, kinuna ni Ampucao Punong Barangay Eddie Amuasen a natalged ti nasao a bantay ken agtultuloy metlaeng ti panangturong dagiti turista sadiay.
Kinunana nga idi napalabas a lawas ket dumanon iti 400 ti simmang-at iti nasao a bantay.
Malaksid iti daytoy, impanamnama met ni PCI Vicente nga agtultuloy metlaeng ti monitoring ken inspeksyon dagitoy iti intero a munisipyo para iti linak ken kapia sadiay.
