Nainsulto ti maysa a kongresista manipud Mindanao iti komento ni Baguio City Mayor Benjamin Magalong no sadino inawaganna a “moro-moro” ti imbestigasyon kadagiti anti-flood projects.
Sigun kenni House Deputy Majority Leader ken Lanao del Sur Rep. Zia Alonto Adiong nasken a respetuen ti kamara kas institusyon a mang-imbestigar kadagiti alegasyon seknan iti flood projects.
Kinunana a ti imbaga ni Mayor Magalong ket makadadael iti reputasyon dagiti amin a miembro iti kongreso karaman dagiti pudpudno nga agserserbi iti trabaho dagitoy.
Impaganetget pay ni Adiong a ti panagaramatna iti “moro-moro” ket arigna a mangipalagip iti nadagsen a napalabas para kadagiti Muslim.
Daytoy ket nagtaud iti maysa a pabuya idi panawen dagiti kastila a nang-ipit kadagiti “Kristiano” ken “Moros” iti tunggal maysa.
Innayonna pay a nupay maar-aramat ti nasao a termino tapno iladawan dagiti peke a pabuya adu latta dagiti muslim a mangibilbilang a sensitibo daytoy.
Inyunay-unayna metlaeng a ti panangrespeto iti institusyon ket saan a mangipamusidaag a panangprotektar iti siasinoman a nagbasol.
