Makidkiddaw iti lokal a gobyerno ti naan-anay a pondo a maaramat para iti panakagaatang kadagiti anti-rabies vaccine.
Sigun kenni Clark Dizon, Nurse V iti Department of Health-Center for Health Development-Cordillera, narigat iti agbirok iti nasao a klase iti bakuna iti Rehion Cordillera a maaramat para kadagiti umili nga agsagsagrap iti panakakagat iti ayop.
Maysa a makitkita a gapuanan dayta ti kinakurang iti pondo a mabalin a mabusbos para iti panakagatang iti bakuna.
Iti baet nga adda ti ipapaay iti Department of Health-Cordillera nga anti-rabies vaccine, saan latta nga umdas daytoy tapno maakomodar dagiti amin nga agkasapulan iti daytoy.
Sigun iti nasao nga opisyal, nangina ti maysa a vial iti nasao a bakuna nu sadino, dumanon iti nasurok sangaribo ti balor daytoy idi napan a tawen ken P2million laeng ti nailatang a pondo para iti daytoy.
Imbinglay pay ti opisyal a panggep ti Department of Health-Cordillera a pukawen ti rabies kas maysa kadagiti World Neglected Disease apaman a madanon ti 2030.//Bombo Genzel Depasyo
