Nakabalud ita iti Lucena Custodial Facility ti maysa a Pulis a nangpangta ken nagpaputok iti paltog iti maysa nga Store idiay Lucena City, Quezon idi Sabado, July 12, 2025.
Nabigbig ti suspek a ni Patrolman Rodolfo Avila Madlang-awa, maysa a Pulis a nakadestino sadiay Lopez, Quezon.
Naala iti CCTV ti panagpukkaw daytoy iti ruwar ti kantina a nakaiggem iti paltog.
Namin-adu pay a nangpangta a patayenna ti kasarsaritana iti uneg ti store.
Maibasar iti imbestigasyon dagiti otoridad, nabartek ti nasao a Pulis ken gimmatang iti Yelo wenno Ice ngem maysa a lalaki ti simmangpet tapno gumatang iti sigarilyo a dagus a tinutukanna iti paltog.
Dua pay a customer ti simmangpet a pinangtaanna, isu’t gapuna a pinasrekda iti uneg ti store.
Dagus met nga inserrada ti grill ti nasao a Tersina, kalpasan a pimmanaw ti suspek.
Ti nasao a suspek ket insuko ti kabsatna iti presinto ken sumangsango iti kaso kas iti Grave Threats, Unjust Vexation, Physical Injury ken Illegal Discharge of Firearms, ken dadduma pay.
Sigun kenni Quezon Police Provincial Office Acting Provincial Director Police Colonel Romulo Albacea, siguraduenda a maikkat ti suspek iti serbisyo kas pulis.
Kabayatanna, kinundinar ti PNP Calabarzon Regional Office ti nasao nga insidente no sadino, inyunay-unayda nga awan ti mailaksid iti linteg, anya man ti rangko wenno kasasaad dagitoy.
