Kidkiddawen manen ti 501st Infantry Brigade kadagiti nabatbati a rebelde a sumuko kagiddan ti panangipaganetgetda a nakalukat paylaeng ti oportunidad para iti linak ken reintegration.
Daytoy ket bayat ti agtultuloy a panagbaba ti bilang iti kameng iti New People’s Army (NPA) iti Cordillera.
Iti maysa a press conference a naisayangkat idi Marso 13, impaganetget ni Infantry Brigade Commander Brig. Gen. Dean Mark Mamaril ti maysa a naballigi nga operasion itay laeng kallabes ket nagresulta iti pannakatiliw iti sangapulo a kameng iti NPA a naglibas manipod idiay Kalinga tapno maliklikan ti pannakatiliw kalpasan ti rinnupak idiay Pinukpuk, Kalinga idi Nobyembre 2025.
Natiliw dagiti rebelde babaen iti panagtinnulong nga operasion iti pulisia ken iti militar iti Quezon ken iti siudad ti Tarlac idi Marso 11, 2026.
Naduktalan a kameng dagitoy iti Ilocos-Cordillera Regional Committee (ICRC), karaman ti lima a maibilbilang a nangato nga opisial.
Sigun kenni Mamaril, dakkel ti epekto dagiti pannakatiliw iti nabatbati a puersa iti grupo ken pammaneknek daytoy iti bileg iti agtultuloy a panagbantay ken koordinasion dagiti ahensia.
Kabayatanna, inulitna manen a kiniddaw kadagiti kameng iti iti komunista a grupo a sumuko nangruna dagiti aglemlemmeng iti kabakiran iti Abra, Kalinga ken Apayao.
