La Trinidad, Benguet – Irekreklamo ita ti maysa nga indibidual ti nabuntog a panangipaay ti Cebuana Lhuillier – Pico Branch idiay La Trinidad, Benguet iti insurance daytoy.
Iti panagturongna iti istasyon ti Bombo Radyo, kinuna ni Frederico Mateo, tubo ti Nagtipunan, Quirino Province ken residente ti Baguio City, dandani uppat a bulanen sipud nagrequest daytoy iti insurance manipud iti nasao a microfinancial services provider gapu ta nagsakit daytoy ngem agingga ita ket awan pay ti naaw-awatna.
Dinakamatna a nagadu ti dawdawatenda kenkuana a dokumento.
Innayonna nga impasa met amin ti annakna dagiti kaskenan a dokumento pakairamanan ti medical certificate ken medical summary form iti opisina ti Cebuana Lhuillier idiay Pico, La Trinidad, Benguet nga isu metlaeng ti pagbaybayaddanna iti kontribusyonna.
Impettengna a tinawen daytoy nga agbaybayad para iti insurance ngem idi daytoyen ti nagkasapulan iti pinansiyal a tulong ket saan a dagus a tinulongan ti nasao nga opisina.
Imbinglay ni Mateo nga awag wenno phone call ti transaksyonda iti nasao nga opisina.
Kabayatanna, inala met ti Bombo Radyo ti benneg ti Cebuana Lhuillier maipapan iti nasao a reklamo.
Sigun iti staff ti nasao nga opisina, amin a request dagiti kliyenta ket ipatpatulodda iti central office dagitoy agsipud ta isuda ti agdesdesisyon maipapan kadagitoy a bambanag.
Impeksana a nalabit a daytoy ti rason nu apay a naitantan ti pannakaipaay ti insurance ni Mateo.
