Manarimaan ti imbestigasion dagiti kameng iti La Trinidad National High School iti nadiskobreda a deadly weapons, arak, vapes ken “momma” kabayatan ti pannakaipatungpal iti Operation Kapkap iti nasao a pagadalan idiay Lubas, La Trinidad, Benguet.
Iti pannakiuman iti Bombo Radyo kenni Alfonso Doriano, School Principal I iti nasao a pagadalan, kinunana a nasken nga imbestigaranda ti nasao a banag gaputa sumagmamano kadagiti nadakamat a banag a nakumpiskar ket naala manipod iti basuraan.
Kinuna ti principal a nalabit naamuanda ti nasao nga operasyon rason tapno ibellengda dagitoy.
Nabigbig metten dagiti sumagmamano kadakuada.
Nabilin metten dagiti guidance councelor ken dagiti maseknan a manursuro nga imbestigaran tapno maamuan pay ni siasino dagiti dadduma pay nga estudiante ti karaman.
Kabayatanna, maipasidong met iti counselling ken naballaagan dagiti estudiante a nabigbig.
Impeksa pay ni Doriano nga agtultuloy latta ti Operation Kapkap dagitoy, ken naobserbaran nga iti simmaruno nga operasion, awan metten ti nadisdiskubreda a kapada a banag.
Imbinglayna met nga adun dagiti nagduduma nga organisasion, asosasion wenno grupo ti nagturong iti nasao a pagadalan para iti pannakikoordinar ken pannakitinnulong tapno mangipaay iti serbisio.
Sumagmamano kadagitoy ket naakomodar babaen iti educational values classes.
Mainaig iti dayta…
Impeksa ni Alfonso Doriano, School Principal I iti La Trinidad National High School, a numan pay saan nga amin ngem kadawyan kadagiti estudiante iti semi-urban area ket mangitugot iti aniaman a banag a mapanunotda a mangallukoy iti atensyon kadagiti kakaduada,
Sigun iti opisial, adda metlaeng ti impluwensia ditoy ti makitkitada iti social media nu sadinno para kadagiti estudiante ket maibilang nga “achievements” nu nagballigi dagitoy, a para kenni Doriano ket saan a rumbeng kuma.
Impetteng ti nasao nga opisial a ti nasken a maaramid ket ti pannakaitandudo iti pro-active ken wholesome values.
Imbinglayna met a maragsakan ken raraemenna ti maysa kadagiti nagbalin a sigud nga estudiantena a nangidonar kadagiti uniporme kadagiti estudiante nga agkapulan iti nasao a pagadalan.
Kinunana a maysa daytoy a pagwadan a nasken a tuladen ken ital-o.
Innayonna pay nga ita laeng a nasaksianna ti nasao nga aramid.
Kabayatanna, inlawlawagna a saan nga interaminte ti panangipawil iti panagaramat iti cellphone iti uneg iti pagadalan gaputa adda dagiti gundaway a kasapulan dagitoy.
Innayonna nga adda met dagiti manursuro nu ania ti aramidenna iti pagalagadan seknan iti panagaramat iti selpon.
Iti sabali a bangir, imbinglayna a “common” ti “bullying” ngem impasiguradona nga ar-aramidenda ti amin a kabaelanda tapno masuruan dagiti estudiante. | via Bombo Noveh
