Naipasidong iti nainget a panag-inspeksyon dagiti nagduduma a bus terminals iti pagilian kagiddan ti panagrugi ti Undas exodus.
Daytoy ket babaen iti panangidaulo ni Acting PNP chief Lt. Gen. Jose Melencio Nartatez Jr.
Sigun kenkuana, naipatungpal ti inspeksyon tapno maipasigurado ti seguridad dagiti pasaheros.
Malaksid iti dayta, nangipatungpal metlaeng ti Office for Transportation Security iti inspeksyon iti Batangas port kagiddan ti panagsangpet dagiti adu a pasaheros.
Sinukimatda metlaeng dagiti X-ray machines, handheld metal detectors, scanners, CCTV systems, ken nagduduma nga opisina kadagiti uneg ti terminal.
Gapu iti dayta, nagresulta daytoy iti panakakumpiskar dagiti maiparit nga igam kas iti kutsilyo, machetes, flammable materials ken dadduma pay.
Kagiddan dayta, nagpalagip manen dagitoy iti publiko a liklikan nga agitugot kadagiti maipawil a banag tapno maliklikan ti panakaitantan ti panagbyahe ken tapno maipasigurado ti kinatalged ken seguridad.
