Nagduduma a gimmick ti ipatpatungpal dagiti agngay-ngayangay a kandidato para iti 2025 National and Local midterm election nangruna idi napalabas a holiday season.
Iti panakiuman ti Bombo Radyo kenni Atty. Elenita Julia Tabangin-Capuyan, Provincial Election Supervisor 3-Office of the Regional Election Director ti Cordillera, inlawlawagna a dagiti nagduduma a political activity, ti panakaipaklat ti tarpaulin, panakaadda iti advertisement, panakaiwaras dagiti kalendaryo ken dagiti nagduduma a wagas iti season of greetings ket saan a maikonsidera kas premature campaigning nu diket maysa daytoy a freedom of expression wenno freewill.
Maibasar iti Republic Act 9369 wenno ti “An Act authorizing the Commission on Elections to use an automated election system,” nailanad iti daytoy a dagiti indibidual a nangipila iti kandidaturada ket saan pay a mabigbig kas kandidato agingga a saan pay nangrugi ti campaign period.
Gapu iti dayta, inlawlawagna a dagiti ar-aramiden dagiti agngay-ngayangay a kandidato ket maysa a karbengan dagitoy a nakagarantiya iti Bill of Rights iti Constitution iti Republic of the Philippines ken saan pay mabalin nga ibilang kas premature campaigning.
Maipalagip nga idi napalabas, adda dagiti napilaan iti kaso a premature campaigning gapu iti panagbitla dagitoy, panangisayangkatda iti survey, panangikargada iti banners, panangiwarasda iti nagdduduma a kagawaan ken daduma pay ngem saan dagitoy naipaayan iti pannusa gapu ta saan pay nga opisyal a nagbalin dagitoy a kandidato.
Kinuna ni Atty. Tabangin-Capuyan a gapu ta mabigbigbig kas freedom of expression dagiti aktibidad dagiti agngay-ngayangay a kandidato ket nasken a saanda daytoy nga abusoen kasta met a iti publikon ti makaammo a mangsukimat kadagiti ar-aramiden dagitoy.//Bombo Mera Pacpacan
