Inyebkas dagiti nagduduma a grupo ken abogado a mangibagbagi kadagiti pamilia dagiti biktima iti extra-judicial killing (EJK) a ti pannakemmeg ni sigud a President Rodrigo Duterte ket maysa a napateg nga addang tapno sungbatan ni Duterte ken dagiti kakaduana iti makapapatay a kampaniana kontra iti iligal a droga.
Sigun kenni Agnes Callamard, secretary general ti Amnesty International, ti pannakemmeg ni sigud a President Duterte ket nabayagen nga ur-urayen ken “monumental” nga addang para iti hustisia para kadagiti rinibribu a biktima ken nakalasat iti ‘war on drugs’ ti administrasionna.
Inaklon ti human rights groups a saan a nalaka ti dalan nga agturong iti ibagbagada a “legal victory”, gaputa adu dagiti biktima ti “drug war” ti nasdaaw a nakakita iti pannakakemmeg ni Duterte.
Naakusaran ni Duterte iti pammapatay kadagiti suspek iti iligal a droga idi mayor paylaeng daytoy iti Davao City.
Sigun kenni sigud a Senador Leila De Lima a nangidaulo iti panagimbestigar iti “Davao Death Squad” (DDS), inmobilisado ni Duterte ti vigilante group idi mayor isuna ti Davao City.
Mapapati nga inusar ni Duterte ti “Davao model” idi nagbalin a presidente isuna ti Pilipinas manipod idi tawen 2016 agingga 2022.
Maibasar iti opisial a datos ti gobierno, dumanon iti agarup 6,000 a tattao ti napapatay ni Duterte iti kampaniana a “war on drugs.”
Kabayatanna, maibasar iti website, ti International Criminal Court ket mangsukimat, mangipaulog ti arrest warrant, ken padasen dagiti indibidual a naidarum kadagiti nadadagsen a krimen a kas ti genocide, war crimes, crimes against humanity, crimes of aggression.
Ni sigud a President Rodrigo Duterte ket naakusaran ti “crimes against humanity,” nga inlawlawag ti ICC a kas nadagsen a panaglabsing kas paset ti large-scale attack kontra iti aniaman a sibilian a kas iti pammapatay, panangrames, pannakaibalud, naipatungpal a pannakapukaw, pannakaadipen – partikular dagiti babbai ken ubbing, seksual a panangadipen, panangtutuok, apartheid ken deportation.
