BAGUIO CITY – Naipaima ti logistical equipment kadagiti nagduduma nga unit ti pulisya bayat nga innem a pulis iti rehiyon Cordillera ti napadayawan iti naangay a seremonya sadiay Camp Major Bado Dangwa, La Trinidad, Benguet idi kalman.
Naiwaras kadagiti istasyon ti pulisya iti rehiyon ti innem a hilux, four-wheel drives; lima a .56mm LMG rifles; 24 a 9mm pistols; 68 nga undershirt vest ken saggaysa a night vision goggle ken thermal imager.
Personal nga impaima ni PMGen. Reynaldo Biay, Director for Research and Development ti PNP ti ceremonial key dagiti innem a hilux kadagiti supply officers dagiti innem a police provincial headquarters.
Nakaawat ti Abra PNP iti maysa a riple ken 18 nga undershirt vests bayat a nakaawat ti Kalinga PNP iti maysa a riple ken 8 nga undershirt vests.
Nakaawat ti Benguet PNP ti 24 a pistola ken 8 nga undershirt vests bayat a nakaawat ti Apayao PNP iti 14 nga undershirt vests; ti Ifugao PNP iti 8 nga undershirt vests ken ti Mt. Province iti 12 nga undershirt vests.
Naawat met ti Regional Mobile Force Batallion 15 ti night vision goggle ken thermal imager malaksid pay iti tallo a riple.
Sigun kenni PBGen Israel Ephraim Dickson, Regional Director ti Cordillera PNP, babaen kadagiti nasao nga equipment ket mapabileg pay ti operational readiness ken police visibility dagiti pulis ti Cordillera para iti panakagun-od ti mas capable, effective ken credible a pwersa ti pulisya iti rehiyon.
Kabayatanna, innem a police personnel ti PROCOR ti napadayawan gapu iti nagduduma a naaramidan dagitoy.
Naipaay ti Medalya ng Kagalingan kada PLt. Jeremias Toyokan, PMSM Marlon Claudio ken PSSgt. Elboy Pio ti Benguet PNP gapu iti balligi a panangkemmegda iti maysa a frug courier a nakumpiskaran ti marijuana bricks nga aggatad ti P4.2-M idi August 3 sadiay Acop, Caponga, Tublay, Benguet.
Naipaay met ti Medalya ng Papuri kada PLt. Dionisio Dati Jr., PMSgt. Giordani Bakichan ken PMSgt. Rayan Palaguitang gapu iti balligi a panangisayangkatda iti dua nga aldaw a License To Own and Possess Firearms Caravan sadiay Barbarit, Tagodtod, Langilang, Abra.
