Inyebkas ni Wilson Bumay-et, presidente iti Jeepney Federation Baguio-Benguet a posible a maikkat ti P20 voluntary fare increase.
Iti pannakiuman iti Bombo Radyo, kinunana a panawen kanon tapno ikkaten daytoy gaputa bimmaba ti presio iti diesel, kagiddan ti panangibagana a maragsakan daytoy iti panaggaraw iti presio iti lana.
Nupay kasta, inlawlawagna nga awan pay ti pinal a desision gaputa agtaripnong dagiti opisial tapno ammuen nu anya ti kapanunotan ti kaaduan.
Iti kanito a maikkat ti P20 voluntary fare increase, maikkat metlaeng ti fare matrix a nakapaskil kadagiti jeepney iti nagduduma a ruta iti siudad ti Baguio.
Kabayatanna, kinuna metlaeng iti opisial nga awan paylaeng ti naaw-awatda a tulong pinansial manipod iti national agency, wenno ti Department of Social Worker and Development Office.
Sigun kenni Bumay-et, naitantan paylaeng ti naituding a panangiwaras iti ayuda a naisayangkat kuma idi kalman.
