BAGUIO CITY – Impaulog ti gobernador ti Benguet ti advisory daytoy kasaruno ti panakaipasidong manen ti probinsia iti General Community Quarantine (GCQ) agingga inton tapos.
Nailanad iti advisory ni Governor Dr. Melchor Diclas a maipalubos ti iruruar iti pagtaenganda dagiti 15-anyos nga agpababa ken 65-anyos nga agpangato para iti napateg a transaksion.
Nasken met a maikoordinar iti maseknan a lokal a gobyerno ti aniaman a panagurnong para iti lamay ken tabon nga agpaut laeng iti uppat nga aldaw, no sadino, ti umuna nga aldaw ket para laeng iti pamilya ti pimmusay.
Agtalinaed ti panaggaraw dagiti Authorized Persons Outside Residence, dagiti personnel ti gobyerno a karaman iti critical services ken dagiti amin a klase ti cargo wenno delivery vehicles.
Maipalubos ti panaglukat dagiti tourism destinations ngem malimitaran kadagiti lokal a turista ken maipatungpal dagiti paglintegan kontra iti COVID-19.
Malimitaran met iti 30% agingga 50% ti venue capacity para iti religious gatherings ngem nasken a beripikaren ti maseknan a lokal a gobyerno ken masurot dagiti paglintegan kontra iti COVID-19.
Maipalpalubos met dagiti non-contact sports wenno ay-ayam ken dagiti personal care services a saan a kasapulan ti panagikkat ti face mask kas kadagiti salon wenno parlor.
Agtalinaed pay a silulukat iti publiko dagiti community pantries ngem nasken a masurot dagiti pagaladagan iti panagala kadagiti taraon.
Naiyunay-unay pay iti advisory ni Gov. Diclas ti panagtulnog dagiti umili ti Benguet kadagiti amin a paglintegan kontra iti COVID-19.
