Nangisayangkat iti panagtaripnong ti nagduduma a sektor nu sadinno tinalantanda dagiti isyu ti parapubliko a transportasion iti siudad ti Baguio a naisayangkat idi Marso 18, 2026 iti Multi-purpose Hall iti Baguio City Hall.
Nakipaset iti panagtaripnong dagiti drayber, kameng iti pulisia, ken dagiti opisial iti siudad ken napagsaritaan ti kinakurang dagiti jeepney kadagiti ruta a paturong ken paruar iti siudad, atidog a pila iti pasahero, nakaro a trapiko, ken dadduma pay a pakaseknan iti tengnga iti agtultuloy a panagngato iti presio iti krudo.
Imbinglay dagiti nakipaset ti singasing wenno rekomendasionda, ngem sigun kadagiti dadduma, dagiti naisingasing ket nabayagen a maipatpatungpal.
Imbinglay metlaeng dagiti drayber ti kinakurang iti pammastrekanda ken ti rigatda iti biahe nangruna kadagiti agbibiahe iti addayo a lugar.
Maysa kadagiti mangparparigat iti kasasaadda ti “boundary system,” nu sadinno kasapulanda nga agremit iti umno a gatad iti operator iti tunggal aldaw.
Sigun met iti maysa a pannakabagi iti transport group, maysa kadagiti kadakkelan a parikutda ket ti trapiko nangruna iti agsapa ken iti malem. Malaksid iti dayta, madlaw metlaeng ti saan a panagtunos iti bilang dagiti jeep nga agbibiahe iti aldaw nu idilig iti malem, kasta metten ti pakaseknan iti distansia iti ruta a mangituntunda iti pannakasayang iti oras ken krudo nu bassit ti pasahero.
Adda dagiti nangisingasing a manayunan ti bilang dagiti jeepney ken dadduma pay a public utility vehicles, kasta metten ti panangpalaw iti ruta a daldalyasatenda tapno makessayan ti oras iti panaguray kadagiti pasahero—nangruna kadagiti lugar a saan pay a saklawen ti agdama a ruta.
Maysa pay kadagiti isyu a natalantan ti atidog a pila iti pasahero tunggal rush hour, agpada a manipod iti barangay a paturong iti siudad ken pasubli, a mangituntunda iti tension ken saaan a panagkinnaawatan.
Insingasing metlaeng dagiti dadduma a nakipaset nga adalen ti oras nu kaano ti kaatidugan ti pila, ken isimpa ti bilang dagiti parapubliko a lugan a mairuruar iti tunggal aldaw tapno agbalin a balanse ken “efficient” ti sistema.
Immanamong met ti publiko ken ti lokal a gobierno a kasapulan iti long term solution iti deployment kadagiti jeepney units tapno maipasigurado ti nasaysayaat ken sustainable transportation iti baet iti panagngato iti presio iti krudo ken kasapulan a naparpartak a biahe.
Dinakamat metlaeng dagiti operator ti saan a patas a bilang dagiti yunit iti tunggal ruta.
Iti pakabuklan, nasungbatan ti kaaduan a damag ken naipaayan iti solusion dagiti isyu.
