BAGUIO CITY – Nagsasaritaan dagiti mayor ti Baguio, La Trinidad, Itogon, Sablan, Tuba and Tublay (BLISTT) Area dagiti maipatungpal a wagas tapno maliklikan ti panagngato ti kaso ti COVID-19 kabayatan ti Yuletide Season.
Nagtataripnong idi kalman dagiti mayor dagiti nasao a lugar kasta metten dagiti pannakabagi ti World Health Organization-Philippines.
Impanamnama ni Baguio City Mayor Benjamin Magalong ti panangipabulod ti siudad iti isolation beds kadagiti kabangibang a munisipio a pakailistaan ti nangato a kaso ti COVID-19.
Kinunana a maiwaras met dagiti contact tracers ti siudad kadagiti paset ti LISTT area a makailista iti adu a positibo a kaso.
Imbalakad ti WHO-Philippines ti agtultuloy a monitoring iti kasasaad ti COVID-19 iti lokalidad.
Nairekomendar ti pannakaipatungpal ti nainget a border control, surge capacity ken dadduma pay tapno saanen a karkaro nga agrawas ti COVID-19.
