Mapadpadaanan itan dagiti nagduduma nga aktibidad para iti umadanin a holy week ken summer vacation iti siudad ti Baguio.
Sigun kenni Engr. Alec Mapalo- Supervising Tourism Operations Officer-DOT-Baguio, adu dagiti nakalinya nga aktibidad para iti bulan ti Abril ken Mayo a mabalin a pagturungan dagiti turista wenno dagiti umili iti siudad.
Kinunana nga ita a holyweek ken December ti kadawyan a peak season iti siudad ngem itan ket addan dagiti agturturong a turista iti siudad iti aniaman a bulan rason a saan laeng nga ita a bulan ti peak season.
Naituding a mangrugi dagiti aktibidad inton Abril trese, no sadino maangay daytoy kadagiti nagduduma a simbaan a pakairamanan ti traditional Palm Sunday Mass a sarunuen dagiti religious activities manipud Abril katorse agingga iti Easter Sunday inton Abril baente.
Impettengna a saan laeng a breath Baguio ti maidiaya kadagiti turista no diket ti breath spiritual ken ti breath wellness.
Malaksid iti dayta, maysa kadagiti highlightsda ita a bulan ket ti ” Mangan Taku Cordillera Food Festival” a mangrugi inton abril baente kwatro agingga abrail baente otso.
Manamnama a maidiaya ditoy dagiti produkto manipud kadagiti dadduma a probinsya iti rehiyon Cordillera.
Namnamaen met dagitoy nga adu dagiti makipaset manipud kadagiti innem a probinsya iti rehiyon.
Kabayatanna, imbinglay ni Engr. Mapalo nga adda ti baro nga aktibidad a maiyuswat kas iti internation dance day wenno Baguio Dance Festival manipud abril baente tres agingga inton abril baente sais.
Malaksid kadagita ket adu pay dagiti nagduduma nga art exhibit a maiparang iti intero a siudad.//Bombo Noveh Organo
