BAGUIO CITY – Nakasaganan dagiti aktibidad a maisayangkat inton Miyerkoles, September 1 kagiddan ti panakarambak ti Baguio Day nga addaan ti tema a “Moving Forward As One”.
Iti panakiuman ti Bombo Radyo Baguio, kinuna ni City Tourism Officer Engr. Alec Mapalo a dagitoy dagiti aktibidad a mabalin a maaramid tapnu agbalin nga exciting wenno makapagagar ti selebrasyon ti Baguio Day iti baet dagiti limitasyon nga ituntunda ti agdama a pandemya.
Kinunana a naksayan dagiti aktibidad ken saanen a maisayangkat ti kadawyan a parada ken agbalin a virtual ti programa a maangay iti Baguio Convention Center.
Dinakamatna nga agingga laeng iti 80 nga indibidual ti makipaset iti aktibidad sadiay ngem mabalin a mabuya ti virtual program iti online.
Sigun kenkuana, tampok iti programa ti virtual recognition dagiti lima a napili nga Outstanding Citizen of Baguio para ita a tawen ken mabuya ti video message ni Presidente Rodrigo Duterte ken dadduma pay nga opisyales.
Agserbi a kangrunaan a tampok iti selebrasyon ti panakaiyusuat ti BREATHE BAGUIO! a baro a destination brand ti siudad a sarunuen ti panakaiparang ti Baguio Urban Core Heritage Development Plan ken ditoy a makita ti plano ti city government a pagbalinan dagiti heritage sites ken ti urban center, partikular ti Central Business District.
Maisayangkat metlaeng ti State of the City Address ni Mayor Benjamin Magalong sakbay ti panakaiparang iti publiko ti mock-up green walks sadiay Upper Session Road a mangipakita iti pagbalinan dagiti pedestrian sidewalks ti siudad.
Karaman pay kadagiti naisagana nga aktibidad ti online Baguio history quiz para kagiti agtutubo inton September 1, ti panakapintor ti baro a mural iti retaining wall iti BGH Rotunda a maawagan ti Wall of Heroes ken pakaitampokan dagiti frontliners, ken ti virtual a panakaisayangkat ti Miss Baguio 2021.
Maiyusuat met inton September 2 ti Smart City Command Center ti Baguio.
Nupay kasta, inton Dominggo, August 29 ket mairikep manen ti dua a linya ti Session Road ken ti tema dagiti pasdek ken mailako sadiay ket western and country.
Maigiddan pay ditoy ti panagbisikleta dagiti cycling enthusiasts.
Inyunay-unay ni Engr. Mapalo a babaen kadagiti aktibidad ti Baguio Day ket maipakita kadagiti umili no kasano ti panagsagana ti siudad para iti agbalin a sitwasyon kalpasan ti agdama a pandemya.
