BAGUIO CITY – Nadadael ti nagduduma nga igam a naipaima iti sidong ti Normalization Program para iti Cordillera Bodong Administration – Cordillera People’s Liberation Army (CBA-CPLA) sadiay Camp Bado Dangwa, La Trinidad, Benguet idi kalman.
Indauluan daytoy ti Office of the Presidential Adviser on the Peace Process (OPAPP) babaen kenni Presidential Peace Adviser Secretary Carlito Galvez Jr.
Paset daytoy ti agtultuloy a saritaan kappia ti gobyerno ti Pilipinas ken ti CBA-CPLA wenno ti Mt. Data Peace Pact.
Iti panagbitla ni Galvez, kinunana a dakkel daytoy nga addang ken panangipakita ti CBA-CPLA a taltalikudandan ti armed conflict para iti saritaan kappia.
Dinayawna met ti ar-aramiden ti nasao a grupo iti saritaan kappia kas iti panagserbi ti 168 a kameng ti CPLA iti armada pwersa ti pagilian ken ti 508 a kameng ti grupo kas bantay gubat ti rehion iti sidong ti DENR.
Pakabuklan a 444 a paltog ti nadadael itay agsapa ken dagitoy ket naipaima iti gobyerno idi pay 2011 malaksid iti 27 a pampabettak a nadadaelen idi 2013.
Mapagbalin met nga art work wenno memorabilia dagiti nadadael nga armas ken mai-display daytoy sadiay Mount Data kas pananglagip iti nakabuangayan ti saritaan kappia ti gobyerno ken ti CPLA idi 1986.
Agyam-yaman ken namnamaen met ni Leonardo Bon-as, maysa kadagiti nakasaksi iti panakabukel ti saritaan kappia ti panakaituloy daytoy kagiddan ti panakaragpat ti arapaap nga otonomiya ti rehion Cordillera.
