[photo credi to to the owner]
BAGUIO CITY – Agsagsaganan dagiti pagadalan ditoy siudad ti Baguio para iti pannakipaset dagitoy iti nagduduma a kompetisyon iti Baguio Flower Festival wenno Panagbenga 2018.
Sigun kenni DepEd – Baguio City Schools Division Superintendent Dr. Federico Martin, nakitaripnong ti DepEd kadagiti pannakabagi ti nagduduma a pagadalan iti siudad para iti panagsagana dagitoy iti drum and lyre ken street dancing competitions a paset ti Panagbenga.
Kinunana nga iti agdama ket agsansanayen dagiti estudiante a makipaset kadagiti nasao nga aktibidad.
Impanamnamana pay a mabalanse ti panagadal ken extracurricular activities dagiti estudyante a makipaset kadagiti nasao a kompetision.
Innayonna a kasaritada dagiti mannursuro ken trainers tapno malimitaran ti oras a panagsagana dagiti ubbing tapno saan unay dagitoy a mabannog ken tapno masapa met laeng dagitoy a makaawid.
Impanamnama pay ni Martin a tumulong ti DepEd iti pannakaibaklay dagiti magastos iti pannakipaset dagiti estudyante iti drum and lyre ken street dancing competitions.
Kinunana nga adda latta dagiti masapul nga ibaklay dagiti nagannak ngem bassit laeng daytoy.
