BAGUIO CITY – Pormalen a naipila iti Baguio City Prosecutor’s Office ti nagtutuon a kaso kontra iti taxi driver a nangdarundun iti maysa a pulis a traffic enforcer sadiay Abanao Street, Baguio City a naalaan ti video.
Naipila dagiti kaso nga attempted homicide, drunk driving, direct assault upon a person in authority, disobeying a person in authority ken oral defamation kontra kenni Jone Domiguez Buclay a driver ti ‘J Mabalot Taxi’.
Pagyamyamanan met ti complainant a ni Patrolman Julius Walang ti Traffic Enforcement Unit ti Baguio City Police Office (BCPO) a pormalen a naipila dagiti kaskenan a kaso kontra kenni Buclay.
Kinunana a ngimmato ti moralna ken ti pulisya ti Baguio City.
Innayonna a desidido daytoy a saan a maki-areglo iti taxi driver ken lumaban daytoy agingga a maragpatna ti hustisya nangruna ta saan a nagkiddaw iti dispensa ni Buclay.
Kabayatanna, dinakamat ti BCPO nga ipilaanda iti kaso nga administratibo ti huwes a maatap a nakibiang iti kaso a nagresulta iti dagus a panakawayawaya ni Buclay nga uray saan pay daytoy a naipasidong iti inquest proceeding.
Kinuna met ti Land Transportation Franchising and Regulatory Board nga im-imbestigarandan ni Buclay ken ti operator ti taxi unit ken maisagsaganan ti civil case kontra iti akinkukua iti taxi nga imanmaneho ni Buclay.
Maipalagip a tikitan kuma ni Pat. Walang ni Buclay gapu iti panaglabsing daytoy iti linteg trapiko idi December 31 ngem intuloy ni Buclay nga inyabante ti taxi nga uray adda ti pulis iti sangwanan ti taxi a nagresulta tapnu agkapet ti pulis iti hood ti taxi.
