BAGUIO CITY – Maadal manen dagiti pagalagadan iti panagsang-at dagiti turista iti nalatak a Mt. Pulag tapno maliklikan ti panakauram manen ti nasao bantay.
Sigun kenni DENR – Cordillera regional director Ralph Pablo, agtaripnongda iti Protected Area Management Board tapnu pagsaritaanda no kasano a mairtengan pay dagiti pagalagadana iti Mt. Pulag.
Kinunana a maysa kadagiti insingasing ti Bureau of Fire Protection ti panagimet dagiti hikers iti fire extinguishers nangruna no agluto dagitoy.
Impalawagna a mabalin nga agitugot iti 2 pounds a fire extinguisher dagiti hikers tapno adda a dagus ti pangsebsebda iti apoy no adda dagiti saan a maliklikan nga uram.
Agingga ita ket nakarikep kadagiti hikers ti nauram a paset ti Mt. Pulag.
Kabayatanna, impannakkel ni Mt. Pulag Parks Management Superientendent Teber Dionisio nga agingga ita ket adu latta dagiti agturturong a turista iti Mt. Pulag iti baet ti napasamak a panakauram ti 5.7 kilomters a paset daytoy itay laeng nabiit.
Kinunana nga adu dagiti nagpareserba a turista nga agturong sadiay inton bigat ken inton Dominggo.
Kagiddan iti daytoy, impanamnamana nga agbalinda nga alerto ken naridam tapnu awan dagiti agturong iti nauram a paset ti bantay.
Ipakpaka-awatda met kadagiti turista a napeggad ti nauram a paset ti bantay gaputa posible a margaay daytoy nangruna ta awanen ti ru-ot a mang-iggem iti daga.