BAGUIO CITY – Ad-adda pay nga inirtengan dagiti pulis nga agbambantay kadagiti border checkpoints a pastrek iti nagduduma a munisipyo ti Benguet ti panagsukimat dagitoy kadagiti dokumento dagiti travelers a saan a residente ti probinsia.
Sigun kenni P/Major Cleff Vencio, Chief of Operations ti Benguet Provincial Police Office, itultuloyda nga iyem-implementar ti polisiya a saan a mapastrek iti masakupan ti probinsia dagiti non-Benguet residents no saan dagitoy a mangipakita iti negatibo a resulta ti RT-PCR test wenno pammaneknek a dagitoy ket fully vaccinated.
Dinakamatna a dumanon iti 17 ti border checkpoints kadagiti 13 a munisipyo ti Benguet ken pito met ti kangrunaan a border control checkpoints.
Impettengna a nasken nga agtungpal dagiti non-Benguet residents iti nasao a polisiya gaputa matiliw ken mapilaan dagitoy iti kaso no saanda nga agtungpal.
Inyunay-unayna met a dakkel a panaglabsing ti panagaramat kadagiti pekete a dokumento, pakairamanan ti panang-tamper kadagiti maiparparang a dokumento.
Nupay kasta, dinakamat ni Major Vencio a dagiti awanan ti dokumento nga agpilit a sumrek iti masakupan ti Benguet ket maipasidong iti triage tapnu maamuan no dagitoy ket addaan ti sintomas ti COVID-19.
