Imbilin ni Philippine National Police(PNP) Acting Chief PLtGen.Jose Melencio Nartatez Jr. ti naing-inget a panakaimbestigar ti kaso a pammaltog idiay Sibulan, Negros Oriental a nakairamanan iti suspek a pulis, tallo a biktima a pulis,ken maysa a sibilyan.
Impetteng ni Nartatez a rumbeng laeng a masungbatan amin nga anggulo ti insidente iti ipatungpal nga imbestigasyon dagiti kameng iti Police Regional Office Negros Island Region (PRO-NIR).
Inyunay-unayna a saan a rumbeng a mapasamak ti cover up iti nasao a kaso tapno makita ti pudno a napasamak ken motibo.
Kagiddan dayta,pinalagipan ti hepe dagiti komander a mangipatungpal dagitoy iti nainget a panagbantay kadagiti kameng ti masakupanda nga istasyon tapno mapagtalinaed ti displina iti nasao a law enforcement agency.
Maipalagip a simmuko kadagiti otoridad ti suspek a ni Police Staff Sergeant Bonifacio Saycon Jr. maysa laeng nga oras kalpasan ti maatap a panangpalpaltogna kadagiti uppat a biktima.
Nabigbig ti sibilyan a biktima iti nagan a Sheila Mae Denauanao bayat a dagiti tallo a biktima a pulis ket pakairamanan ti hepe ti Sibulan Police Station a ni Police Captain Jose Edrohil Cimafranca, Police Senior Master Sergeant Tristan Joseph Chua ken Patrolman Rey Albert Temblor.
Napasamak ti insidente iti maysa a resto bar iti pasado alas nuebe ti rabii idi January 9.
