BAGUIO CITY – Impetteng ti Baguio City Polie Office (BCPO) a maituloy latta ti nainget nga implementasyon dagiti paglintegan kadagiti nagduduma a border control checkpoints a pastrek iti siudad ti Baguio.
Inwaragawag daytoy ni PCol. Allen Rae Co, dadaulo ti BCPO iti baet dagiti adu a reklamo a naaw-awatda seknan iti nasao a paglintegan.
Kinunana a paset ti responsibilidadda ti panakaipasigurado a saan nga ad-adda nga umado ti kaso ti COVID-19 iti lokalidad babaen iti nainget a panakaipatungpal dagiti paglintegan iti border control checkpoints.
Dinakamatna metlaeng nga adda dagiti sumagmamano nga indibidual nga agar-aramat iti nagan dagiti opisyales ti Baguio tapnu laeng makastrek ditoy siudad ngem saanda a palpalubusan dagitoy.
Innayonna a nainget ti panangsukimat dagiti pulis kadagiti checkpoints iti dokumento dagiti sumsumrek iti siudad ken sumagmamano kadagitoy ti nagresulta iti panakatiliw dagiti indibidual a nagaramat ti peke a dokumento.
Nupay inaklon ni Col. Co a saan a perpekto ti panangipatungpalda kadagiti paglintegan kadagiti border checkpoints, inkarina met a paspasayaaten ken pappapintasenda pay daytoy.
