BAGUIO CITY – Nainget a pinaglibakan ni Tuba, Benguet Mayor Clarita Sal-ongan ti impablaak ti maysa a social news and blog site mainaig iti panagpositibona iti COVID-19 kalpasan ti panagpabakunana kontra iti nasao a sakit.
Mabasa wenno nailanad iti nasao a site a nagpositibo ti mayora iti COVID-19, nasurok dua a lawas kalpasan a nabakunaan wenno naawatna ti umuna a vaccine dosage daytoy.
Iti interview ti Bombo Radyo Baguio, impetteng ni Mayor Sal-ongan a saan pay daytoy a nabakbakunaan kontra iti COVID-19 gaputa kas maysa a senior citizen ket saan daytoy a kwalipikado iti Sinovac vaccine a naipaay iti munisipyo ti Tuba.
Innayonna nga awan paylaeng ti panggepna nga agpabakuna kontra iti COVID-19 gaputa nakaptan metten daytoy iti nasao a sakit.
Dinakamatna nga iti agdama ket addan daytoy iti natalged a kondisyon ken ur-urayenna laengen a malpas ti quarantine-na sadiay Benguet General Hospital.
Maipalagip a maysa ni Mayor Sal-ongan kadagiti lima a mayor iti probinsia ti Benguet a nagpositibo iti COVID-19.
