BAGUIO CITY – Inkalintegan a mismo ni Baguio City Mayor Benjamin Magalong ti maatap a panangisayangkat iti pasken ken panaglabsing iti curfew ti grupo ni PNP Chief Archie Gamboa kabayatan ti kaaddada ditoy Baguio City.
Iti panakiuman kenni Mayor Magalong, pinaglibakanna ti maibagbaga a party ken impettengna nga awan ti naited a VIP treatment iti PNP Chief.
Inlawlawagna a dagus nga inimbestigaranna ti nsao nga isyu idi naidanun kenkuana dagiti nasao nga alegasyon ken sadiay a naamuanna a naki-dinner laeng ni Gamboa kadagiti sumagmamano a bisita daytoy iti Chief PNP Cottage iti uneg ti Navy Base.
Sigun kenkuana, awan ti buffet ken simmurot iti social distancing ti limitado a bilang dagiti bisita.
Linawlawaganna pay nga adda ti singer iti nasao a dinner tapnu maliwliwa dagiti bisita ngem inyunay-unay ti mayor nga awan ti banda a nagtukar.
Innayonna a nalpas ti nasao a pangrabii sakbay pay ti alas dies ti rabii a naituding a curfew iti siudad.
